Minista blong lands, Ralph Regenvanu i talem se Lini De hemi blong yumi honarem Late Father Walter Lini.
Mr Regenvanu i talem se honoring blong de ia hemi blong honarem wan man be hemi blong honarem tu wan ting ting mo wan samting we hemi happen tru long histri blong Vanuatu.
Hemi talem se histri ia, hemi bin lukim ol lida, oli go tugeta blong fait from wan samting mo oli winim.
Long toktok blong hem blong celebresen blong Lini Dei long Port Vila long Monday, Mr Regenvanu i talem se Lini Dei, hemi wan taem blong ting baut tu olgeta we oli bin wok tugeta wetem hem blong kasem indipendens blong Vanuatu.
Hemi talem se wan samting we yumi honarem tu long Lini De, hemi fasin we hemi unaetem nesen blong mekem se long 1979 eleksen, i bin kat 2/3 we oli wandem blong kantri i kasem indipendens.
Mr Regenvanu i talem se hemia, hemi wan uniti we yumi neva luk. Hemi talem se uniti we hemi lid igo long indipendens, hemi mekem se yumi winim bak graon blong yumi, yumi winim bak sitisenship blong yumi mo tede yumi bos blong yumi wan.
Mr Regenvanu, hemi mekem tok tok ia taem we hemi bin stap givim tok tok blong hem blong makem Lini De long bifo las sande long Not Pentecost.
“Gavman we istap long foret blong yu, mifala i honarem de ia mo hemi wan ‘inspiration’ blong mifala tu long histri blong kantri blong kantri blong yumi. Gavman we Charlot Salwai Tabimasmas i lidim, hemi wan gavman we sapos yu luk insaed ia, yumi kat VP, NUP, MPP ol nara pati we oli kamaut long VP mo yumi kat UMP, RMC, Nagriamel, FMP mo Graon mo Jastis Parti, yumi kat Grin Pati, yumi kat anglofon mo yumi kat francofon. Yumi kat tu evri jioj, oli stap insaed,” Mr Regenvanu i talem long ol pipol blong Not Pentecost.
Hemi talem se ol pati we oli stap long gavman tede, oli saenem wan MOA blong gavman blong tede mo taem ia ikat 5 UMP MP, oli kam insaed bagegen mo hemi mekem se naoia yumi 39 MP, tugeta oli stap wetem gavman.
Mr Regenvanu i talem se taem yumi go long eleksen long 22 Januari, pipol blong Vanuatu, oli disaed blong jenisim ol MP mo taem ia oli votem ol niu MP igo insaed. Aut long ol niu MP ia, ikat 4 we papa blong olgeta, oli bin MP bifo.
Hemi talem se mifala i harem krae blong yufala ol pipol we yufala istap talem se yufala i taet blong gavman, hemi stap jenis.
Hemi talem se mifala i harem tu se pipol i taet long politikol instabili, taet blong politik i divaedem komuniti mo hemi mekem se long taem blong eleksen family i agensem family bagegen. Mr Regenvanu i talem se long las 3 yia, Vanuatu, hemi bin kat 4 praem minista. MP blong Port Vila ia, hemi talem se evri taem gavman i jenis, sevis blong gavman igo long ol pipol hemi stop.
Hemi talem se ting ting blong Uniti Front for Change hemi blong yumi go tugeta blong jenisim politikol system blong yumi. Mr Regenvanu i talem se naoia we gavman, hemi kat sapot blong 39 MPs, hemi save mekem jenis insaed long konstitusen.
Minista Regenvanu i talem se pipol blong Vanuatu i krae long taem blong yumi jenisim konstitusen blong mekem se inomo kat man i save jump jump olbaut. Mr Regenvanu i talem se blong yumi kat uniti blong ol MP tede, ol MP, oli mekem bigfala sacrifaes blong mekem se i mas kat uniti ia.
Mr Regenvanu i talem se ol MP, oli putum asaed, ol politikol inters mo putum national intrest festaem blong pipol i save kat wan gavman we hemi kat namba mo hemi steibol. Hemi talem se jenis blong konstitusen hemi blong benefit blong ol pikinini blong Vanuatu long tumoro.
“Mi wandem putum wan kuesten long yufala. Mi fala ol MP I redi. Mi fala i redi blong wok wan be yufala, ol jioj, ol chief mo ol komuniti lida, yufala I redi blong wok wan tu?,” Mr Regenvanu i askem olgeta.