Wan kampani blong Niu Zilan, Fulton Hogan, ibin winim contrak blong riperem Bauerfield Intanasinol Eapot long Port Vila.
Daerekta Jenerol blong Ministri blong Infratsraksa mo Pablik Utilities, Johnson Piniaru ibin saenem contrak ya las Fraedei afta we Steering Komiti blong Vanuatu Projek Manejmen Unit (vPMU) ibin lukluk long Ivaluasen Ripot blong VPMU mo apruvum nem blong kampani.
Saening ya nao I kliarem rod blong wok I save stat blong riperem bigfala eapot ya we pua condisen blong hem I fosem Air Niu Zilan, Qantas mo Virgin Blue blong saspendem ol flaet blong olgeta ikam long Port Vila.
Samtaem long 2012 finis, ol ripot blong ol aviation expet ibin soem aot nid ya blong riperem bigfala eapot ya be politic ibin intafea long managemen blong aviation mo desisen blong witj kampani nao I mekem wok ya, mekem se wok igo fas istap. Long 2013, Praem Minista taem ya, Moana Carcasses I saenem wan consesen agriment blong USD 350 million blong wan kampani blong Singapore I riperem Bauafield mo mekem I longwan moa. Agrimen ya hemi blong kampani ya I apgredem 5 nara eapot long ol aelan mo afta long ol wok ya bae hemi tekem control long olgeta long wan perod blong 50 yia, blong winim baek mane blong hem. Agrimen ya from I kat tumas man ino agri long hem nao igo jas istap, mo tu from ol kot disisen ova long hem.
Long taem blong Gavman blong Joe Natuman ya nao issue blong emejensi ripe blong Bauafiel ikam antap bakegen. Gavman taem ya I agri se Wol Bank nao bae I givim loan blong riperem kwik-taem eapot ya, be afta we Mr Sato Kilman I tekova Gavman I jenisem tingting ya mo talem se wan kampani blong Singapore nao bae I mekem wok ya from cost blong hem I low.
Niufala praem minister, Charlot Salwai Tabimasmas, ibin go insaet wetem strong tingting blong luk se eapot ripe projek ya I mas stat hariap, folem wan emejensi miting we Kaonsel blong ol Minista I agri long hem long Fraede 12 Februeri, emia wan dei afta we Gavman ya I stanap.
From emejensi situesen blong Bauerfield ya nao Long Wednbisdei las wik, ibin kat wan emejensi prosess blong spidim rod blong kasem mane anda long Wol Bank Loan, mo ivaluasen blong hem I tes finis gud long wik ya.
Total mane blong emejensi wok blong Bauerfield ya I kasem USD 1,237,766.88, or samples Vt139 million.
Fulton naoia istap mekem redi ol ting blong saenem contrak blong hem mo putum ol masin igo wok insaet long restricted zone blong Bauafield.
Lukluk istap se bae I tekem olgeta samples 56 dei stat long dei we oli saenem contrak. Ikat lukluk istap se evri nara samting bae I redi gud mo wok bae I kik-off long 15 Maj 2016.
Wetem taeming blong ol wok ya, Gavman istap lukluk se projek blong imejensi ripe wok ya bae I finis lo namba 6 April.
So long manis Maj, bae ol ship wetem hgevi ikwipmen blong mekem wok ya bae oli kasem Vila haba.