Clik here to view.
Praem Minista we I minister risponsibol long Media long Vanuatu, Charlot Salwai I askem strong long ol junalis mo media long Vanuatu blong givimaot ol ripot we I fea, I stret mo I tru.
PM Salwai I mekem stetmen ia taem I visitim Vanuatu Broadcasting mo Television Corporation iestede aftenun.
Hem I talem se ol junalis long Vanuatu oli mekem plande gud wok blong givimaot infomesen I go long pipol, be wetem pua kaverej tu blong radio mo nasonal television I stap yet olsem wan big jalenj we VBTC I nid blong faenem ansa blong hem.
Hem i rifea I go long Capital FM 107 long wider coverage we I stap mekem tede long Vanuatu mo long wol.
Hem I talem se role or responsibility we Capital 107 I stap mekem, I gud tumas, no mata we radio stesen ia I no risivim wan mane I kam long gavman blong Vanuatu. Hem I talem se kaverej blong las palamen miting blong tokabaot nasonal badget, long March yia ia, we I kamaot live tru long Capital FM 107, I shud kamaot nao long nasonal radio blong gavman, hemia from grant or mane I stap risivim evry yia.
Hem I askem strong long bod mo manejmen blong VBTC blong lukluk mo traem fixim ol problem ia.
Naoia nomo, frequensi blong Capital FM I kasem klosap evri aelan blong Vanuatu mo I stim live online igo long 160 kaontri lo wol ya.
Praem Minista Salwai I stap mekem ol toktok ia long semtaem we gavman mo VBTC I welkam wan kampani blong Jaena we ol representative blong hem I stap long Vila long wik ia, wetem ol transmita mo decorder blong niufala projek blong television long Vanuatu.
Hem I talem se wetem plande help mo big mane we gavman blong Vanuatu mo ol nara gavman I stap givim I go long VBTC, mo ol fee we kampani I kolektem long ol tv mo radio stesen, I shud helpem institution ia blong stanap long tufala leg blong hem, mo ranem ol operesen blong hem, mo no dipen oltaem long gavman.
Hem I askem strong long VBTC blong kolektem ol kaon blong ol fee, we samfala radio stesen I no pem yet. From se ol mane ia nao I save helpem raning blong institution ia.
(Pic: PACMAS)
